Славчо Попоски, метеоролог: „Нè очекува врнежливо лето со услови за големи временски непогоди“

Детали

вторник, 14 мај 2024

„Ова лето ширум Европа, како и во Македонија може да има повеќе врнежи од вообичаено, со големи шанси за временски непогоди“, вели метеорологот Славчо Попоски.

Пролетта почна со релативно повисоки температури, но периодов времето е претежно облачно и врнежливо.

А, изгледа слични температури можеме да очекуваме и во голем дел од летото.

Во продолжение, прогнозата на Славчо Попоски за ова лето:

„Во текот на претстојното лето, феноменот 'Ла Ниња' сè повеќе ќе добива на сила, а особено кон крајот на летото и во текот на есента и зимата 2024/2025.

Токму ова ќе услови летово ширум Европа, Балканот, како и во Македонија да има повеќе врнежи од вообичаеното.

Сè поголеми се шансите да се случат и локални, но големи временски непогоди кои би можеле да нанесат и многу штети. Значи, граѓаните да бидат подготвени на сè.

Овој метеоролошки феномен ќе ги зголеми шансите и за многу повеќе снег во Македонија во текот на зимата 2024/2025, а токму кога е активна 'Ла Ниња' во зимскиот период, тогаш снег врне и во Скопје.

Инаку, досега беше активен метеоролошкиот феномен 'Ел Нињо' и тој услови да имаме еден невообичаено топол февруари, па и март.

Поладно време имавме и во април, иако и тој беше за некој степен над просекот гледано по температурите.

Генерално, и зимата 2023/2024 беше со натпросечно високи температури, а речиси и да не видовме снег“.

Спирова С. | Црнобело

фото: Фејсбук, freepik.com