Перница против ‘рчење, перница против киселини: Дали навистина функционираат?

На пазарот се нудат перници со најразлични форми и функционалнисти и има толку голем избор, што не знаете каква да купите.

Некогаш се спиеше на најобична перница, со памучно-сунѓересто полнење. Но, потоа излегоа популарните анатомски перници, кои нудеа правилно држење на вратот.

Потоа излегоа и антибактериски перници, па меки, тврди, големи, тенки, а изборот е толку голем, што потрошувачот некогаш се запрашува дали навистина се функционални.

Да разгледаме неколку видови:

Перница против 'рчење

Има таков облик што ги држи главата и рамениците во права линија и не дозволува да се појавува непријатното 'рчење.

Сепак, не зависи сè само од перницата. Врз 'рчењето влијаат и многу други фактори, како што е пиењето алкохол, прекумерната тежина, но и проблеми со респираторниот систем. Коренот на овој проблем е многу подлабок од исправената положба на вратот при спиењето.

Перници полнети со гранули или со лушпи од жита

Теоретски, ваквите перници го заземаат обликот на главата и овозможуваат мирно спиење, без потење.

Без разлика дали се полнети со синтетички гранули или со природни (некаде во светот се произведуваат перници со полнење од хељда), овие перници се прилагодуваат само на главата и вратот, но 'рбетот останува во неприродна положба.

Исто така, може да се случи да создаваат звуци на шушкање или шкрипење во текот на ноќта, кога се мрдате, што не е многу пријатен звук за слушање кога сте сонливи.

Закосени перници

Имаат триаголна форма и се наменети за луѓето кои страдаат од силни киселини во желудник и рефлукс.

Ова се перници со медицинска намена, бидејќи се закосени под агол помеѓу 20 и 30 степени и не дозволуваат враќање на желудочната киселина во хранопроводот. Исто така, се добри за спиење кога носот е затнат и кога личноста многу кашла поради настинка.

Ова е еден од најуспешните дизајни на наменски перници.

Анатомска вдлабната перница

Според рекламите, ваквата перница ги следи природните искривувања на вратот, правејќи го спиењето удобно.

Она што продавачите забораваат да го напоменат е дека е совршена само за оние кои спијат настрана, но не и за оние кои преферираат да спијат на грб. Единствено треба да се внимава на височината на перницата, бидејќи ако е прениска, тогаш наместо да го олесни, може дополнително да го оптовари вратот.

Удобноста во спиењето не зависи само од перницата. Секако, важни се и душеците и материјалот од кои се изработени постелнините и прекривките.

Затоа, пред да купите перница, најдобро е да знаете што точно барате. Но, врз удобноста може да влијае и навиката. Некои луѓе се навикнати да спијат на ниска и тенка перница, а други на повисока и потврда.

Специјалните медицински перници користете ги доколку навистина имате потреба од тоа.

Можеби ќе помине повеќе време додека да го најдете обликот кој ви одговара, но ова дефинитивно е потрага која вреди да ја направите, во име на удобното спиење.

Е. Д. | Црнобело