Разлики помеѓу професионалните и домашните третмани за разубавување

Козметичката индустрија постојано зема сè поголем замав и може да се најдат огромен број на производи за нега и убавина.

Козметичките салони пак, се преполни со понуда на третмани за убавина кои може да чинат прескапо, но зависно кои од нив.

Сепак, во последно време се многу популарни домашно подготвените маски и третманите кои сами ги правиме дома и може да бидат подеднакво ефективни.

Но, постојат ситуации, кога е подобро да се обратиме кај професионалци, бидејќи не секогаш може да го направиме тоа толку добро самите.

Во продолжение погледнете која е разликата:

Третмани за лице со проблематична кожа

Ако имате проблем со кожата како егзема или постојано појавување на акни, подобро е да се консултирате со дерматолог.

Вообичаените домашни третмани може да бидат лоши за одредена состојба на кожата и да ја иритираат што ќе биде полошо.

Кога на кожата ѝ е потребен посебен третман, обратете се кај специјалист.

Боење на коса

Ако сакате драстично да ја промените бојата на косата од темна кон светла, или ако се фарбате првпат, подобро е да посетите салон, бидејќи може да си ја оштетите косата.

Професионалците ќе ја проценат состојбата на косата и влакното, ќе ви помогнат да ја одберете најдобрата боја и ќе знаат точно како треба да ја постигнат.

Додека пак, ако се обидете сами, може да не успеете од првиот пат и само да ја уништувате косата со секој следен обид.

Боење на трепки и веѓи

Иако има сетови за средување на веѓи и трепки, како и туторијали, сепак се препорачува да не ги правите сами овие третмани.

Многу од нив содржат хемикалии кои може да бидат опасни, па подобро побарајте добар салон кој има позитивни критики за овој процес.

Стискање акни

Иако многумина знаат дека не треба да го прават ова сами, понекогаш е неопходно.

Но, ако не сте внимателни и го правите ова дома, сами, набрзина, може да си оставите долготрајни лузни на лицето или да предизвикате инфекција.

Затоа е подобро редовно да одите на третмани во салон каде овој процес се прави на чист и хигиенски, како и професионален начин.

Депилирање

Иако е полесно кога ќе легнете во салон и некој ќе ја заврши оваа работа за вас, сепак не е невозможно да го направите и сами.

Но, лесни се само деловите како нозете, подлактницата на рацете и надусницата.

Сепак, треба да бидете внимателни и неколку дена пред да се издепилирате може да направите пилинг, а кожата треба да ви биде сува пред депилацијата.

За потешко достапните делови од телото, посетете козметички салон.

Нежен пилинг

Доколку немате чувствителна кожа и немате некои посебни проблеми, а сакате да си направите само нежен пилинг, можете да го направите сами, дома.

На интернет може да најдете многу добри природни маски со состојки кои ги имате дома и нема потреба да плаќате многу за тоа.

Обликување на веѓи

Обликувањето на веѓите може да го направите и сами, но ретко кој ги има потребните вештини за тоа.

Во салоните професионалците подобро ќе ја обликуваат нивната форма, бидејќи работат од подобар агол и знаат како треба да изгледаат, плус, ќе им треба помалку време отколку на вас.

Маникир и педикир

Навистина е релаксирачко искуство д ги средувате ноктите во салон, но тоа вреди само доколку се работи за некоја посебна прилика.

Во спротивно, нема потреба да давате толку многу пари, кога можете и самите да го направите тоа, со малку желба и упорност.

М. М. | Црнобело