Мора да ја испразниш чинијата - Грешки што родителите ги прават во исхраната на своите деца

Сите родители сакаат само најдобро за своите деца. За жал, многу родители ги воспитуваат своите деца точно како што научиле од нивните родители, кои живееле во сосема различни периоди, без да ги анализираат нивните воспитни методи, верувања и животни ситуации.

Времето на нашите баби, многу се разликуваше од денес. Една голема разлика е достапноста на храната тогаш и сега. Додека, во тоа време, многубројните оброци понекогаш биле вистински луксуз, храната е, за среќа, денес лесно достапна.

Што значи дека некои од методите што ги научивме од бабите се едноставно застарени, како правилото: „мора да ја испразниш чинијата“.

Родителите понекогаш делуваат автоматски, без да анализираат сè што научиле од нивните родители, а понекогаш сè уште ги учат децата на застарени принципи. Притоа, со најдобра намера, понекогаш прават повеќе штета отколку добро за децата.

Постојат неколку грешки што родителите често и упорно ги прават, кога станува збор за исхраната на децата, во одлучување кога, колку и што да јадат децата. Лесно е да се заборави дека децата имаат свој внатрешен глас, свои сигнали на глад и ситост.

Нивните тела, исто како и вашите, знаат точно кога, колку и што да јадат. Единствената задача што родителите ја имаат е да ги почитуваат сигналите на нивните деца.

„Мора да ја испразниш чинијата“

Веројатно сте го слушнале или изговориле ова барем еднаш. Децата што мораат да седат на маса и да јадат до последниот залак учат дека не можат да им веруваат на сигналите на своето тело.

Ако повеќе не се гладни и не сакаат да јадат, а вие им нудите „уште 2 залака“ или ги принудувате да седат додека не ја изедат целата брокула, децата учат дека нивното тело не знае колку и што му треба.

Притоа, децата учат да се потпираат на надворешните сигнали, како што е празна чинија, затоа што ја губат моќта да ги слушаат своите сигнали.

Покрај тоа, кога ги принудуваме децата да ги испразнат своите чинии, ги учиме да се прејадуваат - што е уште еден чекор кон лош однос со храната подоцна во животот.

Сите деца (и сите возрасни) знаат точно кога, колку и колку храна им е потребна.

Храна како награда и утеха

Ако децата научат да ја користат храната како механизам за справување со емоции, или како награда, ќе продолжат да го прават тоа и понатаму во животот.

Емоционалното јадење може да стане огромен проблем, не само затоа што ќе ги игнорираат сигналите на телото, туку и затоа што нема да можат да научат поздрави начини да се справат со нивните емоции.

Иако звучи банално и ирелевантно, сè што учиме како деца го носиме со нас понатаму во живот.

Многу е подобра опција да ги научите децата како да се справат со емоциите, отколку да ги научите да бидат замолчени со храна.

Научете ги дека е добро да се чувствуваат тажни или лути, дека плачењето е нормално и дека чувството ќе помине. Прегрнете ги и бидете со нив. Ова ќе им помогне многу повеќе од бисквитите.

Што се однесува до наградата, постојат многу работи што вашето дете ги сака, не само бонбони. Можеби заслужило нова играчка? Можеби заслужило да се прошетате во вашиот омилен парк?

Храната служи да му помогне на телото да функционира нормално, храната не мора да биде заслужена, ниту пак служи како утеха. Покрај тоа, со ова го учите вашето дете дека брокулата е без вкус, а дека чоколадото е посебно.

Забрана

Ако им забранувате бонбони на вашето дете, истите ќе ги смета за посебни. Кога сметаме дека нешто е посебно, дали го сакаме повеќе или помалку? Повеќе, се разбира.

Некои родители ги учат децата да јадат само неколку коцки чоколадо, да јадат слатко само после ручек или само во посебни прилики. Секое од овие тврдења претставува идеална можност децата да развијат нездрав однос кон храната.

Ако сакаат да јадат колачиња, а не смеат да ги јадат пред вас, ќе најдат начин да уживаат во нив, скришно. Со тоа, јадењето станува „криминален“ чин, полн со чувства на срам и вина.

Наместо да ја демонизираат слатката и воопшто нездравата храна, дозволете им на вашите деца редовно да имаат разновидна храна, што вклучува и нездрава храна. Ова ќе им помогне да научат дека целата храна е само храна.

Мала количина на нездрава храна ќе биде доволна да ги задоволи и нема да се кријат од вас.

Најлесен начин е да го ставите десертот, или некоја нездрава храна, како чипс или помфрит, на вашата маса секој ден, по ручекот. Оставете го детето да одлучи што, колку и кога сака да јаде.

Ашера | Црнобело