„Одиш на кафе и за 5 минути се договараш за патување“ – Авантурата во Јордан на Боки Марков
Богомил Марков или на Инстаграм познат како @bokimarkov од Богданци, студент на ФИНКИ, секогаш наоѓа причина да замине на некоја авантура.
На времето фотографијата му била како хоби, но постепено прераснала во професија. Кога сфатил дека сака ова да го работи, нештата почнале да добиваат поразличен правец. Вели дека животот е прекраток за да не се работи она што ве прави среќен.
„Патувањето за Јордан е најинтересното договарање во моето авантуристичко искуство“, раскажува Боки Марков.
„Одиш на кафе со еден другар, среќаваш во кафуле друг другар, седнуваш да го видиш на 5 минути и во тие 5 минути му ѕвони телефон, договара патување. Прашуваш дали може и ти да се приклучиш. Толку. Тоа беше најинтересниот момент што во текот на патувањето си го спомнавме колку сме будали, за 5 минути договоривме да одиме на патување за Јордан“.
Од друга страна, на Боки, Јордан му бил во срцето уште многу одамна. На Инстаграм следи многу фотографи што објавуваат фотографии од Јордан. Еден од нив е @mmuheisen - еден од фотографите на National Geographic и воедно амбасадор на Инстаграм профилот на@visitjordan.
Моментот кога Јордан станала дестинација што мора да ја посети бил кога за прв пат видел фотографии кај еден од неговите омилени фотографии @ioegreer. Мислел дека тоа никогаш немало да се случи, но се уверил дека чудата постојат.
„На почеток знаевме само дека ќе одиме во Јордан. Бевме ограничени со време, само 8 дена и требаше многу прецизно да разгледаме кои локации навистина сакаме да ги посетиме. Првите 4 дена од нашето патување ги издвоивме за Израел. Бидејќи влеговме преку Allenby Bridge, границата што граничи Израел со Јордан, прв град на мета беше главниот град Аман“, раскажува тој.
„Второто место што го посетивме беше Петра кај што сакам да одам одново и одново. Како фотограф таму ми е малку една недела да ги реализирам сите идеи што ми паднаа на памет. За жал, јас бев само еден ден.
Претпоследниот ден се упативме во пустината Вади Рум и при самото пристигање започнавме со едно часовно јавање камили до местото кај што беа џиповите на човекот во чиј камп престојувавме. Во пустината сè беше возбудливо што не можам ништо да издвојам“.
Најмногу впечаток му оставил Al Khazneh. Во Петра тој ден испешачиле 17 km. Таму секој понеделник, среда и четврток се организирале Petra Night Show во 20:00 часот. Тие ја имале среќата да ја посетат Петра токму во некој од тие денови.
„Од целото патување уживав во фотографирање на природните убавини на Јордан, но како што може да се забележи според фотографиите имам доста многу случајни фотографии од луѓе каде бев посебно среќен додека ги создавав“, споделува Боки Марков за неговото патување во Јордан.
Автор: Евгениј Хоуп | Црнобело
Би можело да ве интересира:
Препорачуваме
Најчитани неделава
