5 најубави плажи на Халкидики

Можеби нема да најдете романтични бели куќи и луд ноќен живот како на островите, но ако од одморот барате бел песок и чисто тиркизно море, тогаш Халкидики е вистински избор за вас.

Ова се 5-те најубави плажи на полуостровот:

1. Кавуротрипес - Оваа плажа е лоцирана на 6 километри од Сарти. Се состои од 6 песочни заливи кои се одвоени со карпи. Заради тиркизната и топла вода, ова е една од најубавите плажи на Ситонија, вториот крак на Халкидики.

2. Лагониси - уште една „малдивска“ плажа на источната страна на Ситонија, со многу сенки и ладовини. Омилена е меѓу Грците кои живеат во близина, па може да се случи за викенд да биде голема гужва. Нема содржини и ресторани, па понесете си сопствено освежување.

3. Мирсини, на островот Дијапорос - Од Ситонија, со бротче има тури до блискиот остров Дијапорос, кој крие неколку плажи и заливи од соништата. Посебно се издвојува Мирсини, заради која Дијапорос е наречен и рајски остров.

4. Сани Бич - се селиме на првиот крак, Касандра. На западната страна, во местото Сани сместена е плажа со бел песок и мирис на борови кои ги негува сите сетила. Оваа плажа е достапна само за гостите на луксузните хотели од ресортот. Сообраќај речиси и да нема, заради што ова е и единствен еколошки комплекс. Интересно е што ова одморалиште може да се пофали со уште 3 плажи во карипски стил.

5. Ксенија - Боите на Касандра ги брани и познатата плажа Ксенија, сместена во залив помеѓу Пефкохори и Паљури, на источната страна на првиот крак. Ситен, бел песок, нереално сина вода, и во голем дел од плажата природни сенки – ова се најчестите причини зошто оваа плажа е рај и чест избор на туристите.

Која е вашата омилена плажа на Халкидики?