Човекот кој од Индија до Шведска стигнал со велосипед, заради љубов

Шарлот фон Шедвин била русокоса девојка со сини очи и од шведското благородништво. ПК Маханандија пак, бил сиромашен студент по уметност од источна Индија на најниско ниво според кастите на Индија.

Шансата да се запознаат во Делхи во 1975-та година, кога Шедвин побарала од не него да ѝ наслика портрет, го натерала подоцна да пропатува 3.600 километри на велосипед од Индија до Шведска за да биде со неа.

И покрај различното минато, како да било судбина да завршат заедно, а нивната љубов била инстантна и преголема. Заедно поминале еден месец пред Шедвин да се врати назад во Шведска.

А, Маханандија дал заклетва дека ќе стапи во брак со жената која ја сака, по секоја цена. Таа цена за талентираниот уметник била да продаде сè што има и со само 80 долари да тргне на епско патување со велосипед низ 8 земји цели 4 месеци.

Во тие денови само „Махараџа можеше да си дозволи лет до Шведска“, објаснува Маханандија.

Маханандија додека патувал, спиел во бедуински шатори, младински хостели и под ѕвездите покрај Каспиското Море, а љубовта ја одржувале преку прекрасни романтични писма.

Сега веќе 4 децении се во брак имаат две деца и живеат среќно во Шведска. Дури и филмаџиите се заинтересирани да направат филм од нивната прекрасна приказна.

Напишано во ѕвездите?

Маханандија имал само 9 години кога случајна средба како да одредила каква ќе биде неговата иднина.

Тогаш според кастите на Индија, тој бил „подолу и од кравите и кучиња“ и не смеел да се доближува до храмовите, инаку по него биле фрлани камења. Еден ден добил дозвола да влезе во храмот и да седи позади само никој да не допира.

Тогаш во храмот влегле британски инспектор и неговата сопруга. Од неа добил мал подарок, венец од цветови. „Можеше да види дека не припаѓам тука и како да се сожали на мене. Дојде и ме погали по косата“ - се присетува Маханандија.

Тогаш се вратил дома и на мајка му ѝ кажал дека е вљубен.

За возврат од мајка си добил хороскоп кој вели дека ќе запознае бела жена која ќе поседува џунгла, ќе сака музика и ќе биде Бик.

Случајната средба се случила во 1975-та година кога тој имал 26 години. Тогаш сликал портрети на познатите политичари и славни личности, вклучувајќи го и портретот на Валентина Терешкова, првата жена во вселената.

Тогаш ја запознал Шарлот фон Шедвин, 20-годишна авантуристка која патувала по познатиот „Хипи пат“ за да дојде до Индија. Првиот ден по нејзиното пристигнување го запознала Маханандија кој го сликал нејзиниот портрет, но останал недовршен.

Му ветила дека наредниот ден ќе се врати за подобар портрет.

„Кога ја видов како нешто да ми кажа дека таа е жената од мојот хороскоп. Следниот ден морав да дознаам дали е Бик. Одговорот беше позитивен. Беше Бик. Свиреше на пијано и нејзиното семејство поседуваше дел од шумите на Шведска откако помогнало на кралот во 1700-ите години.“ - објаснува Маханандија.

„Беше судбина да се запознаеме. А, кога тоа ѝ го кажав беше шокирана.“

По само неколку денови стапиле во брак, но таа морала да се врати назад во Шведска.

Во 1977-та година Маханандија заминал на пат до Шведска по истиот пат по кој таа дошла во Индија. Тој пат се простирал од Индија до Пакистан, Авганистан, Иран, Турција, поранешна Југославија до Европа. Тогаш на патниците не им била потребна виза, бидејќи регионот бил безбеден.

А, Маханандија само со 80 долари и цртајќи портрети за храна дошол до својата љубов.

Пристигнал на 28-ми мај 1977-та година.

Сега веќе 40 години се во брак, имаат две деца, Сид и Емели, а по нив ќе се прави и филм.

Н. Г. | Црнобело