На шефот, на нов партнер или некој што има сѐ: Што да подарите кога немате никаква идеја?

Божиќните и новогодишни празници се прекрасен период во кој сите уживаме, се сакаме, се дружиме, си посветуваме внимание и љубов.

Но, исто така, нешто карактеристично за овој период од годината, кој сите најмногу нѐ радува се подароците.

Сепак, колку и да е убав чинот на подарување и колку и да е прекрасно чувството кога ќе израдувате некого, мора да признаеме и нешто друго.

Процесот на одбирање и шетањето по продавници, барајќи подарок за секого е навистина многу мачен.

Посебно, кога не знаете што да му купите на некого и лутате без никаква идеја.

Па, доколку сте во таква ситуација, следниве насоки може да ви помогнат:

Подарок за човекот кој има сѐ

Сигурно некогаш сте се соочиле со ситуација во која мора да купите подарок за некој што има и може да си дозволи сѐ и немате како да го погодите. Сигурно ви поминува низ мисли дека треба да купите  нешто поскапо, но така ќе истрошите голем дел од вашиот буџет.

Токму напротив, доколку личноста може да си дозволи сѐ, нема потреба да ја задоволувате со нешто скапо што секако може да си го купи или веќе го има.

Овие личности најчесто може да се импресионираат со оригинален подарок, независно од цената.

Што да подарите: обичен подарок со некој натпис или изгравирана порака, урамен дизајнерски постер со нечија омилена мисла, или доколку некој е фан на некого или собира одредени предмети – зголемете му ја колекцијата. Книги, ЦД, стручна литература – само најдете го интересот на личноста и веднаш станува полесно.

Подарок за шефот

Шефовите  најчесто се сериозни и ретко кога се задоволуваат со нешто (со чест на исклучоци), па сигурно би ви било тешко да најдете нешто со што ќе го изненадите и нема да го разочарате.

Но, после работата, и тие се само луѓе кои сакаат да се релаксираат и опуштат во слободното време, па токму тоа може да ви пмогне при бирање подарок.

Што да подарите: кутија со разновидни квалитетни кесички чај, шише добар алкохол (сет со чаши), доколку се работи за жена без размислување подарете ваучер за спа третман, разубавување, сауна и слично.

Подарок за оној кој не знае што му треба

Најчесто во оваа група влегуваат најблиските кои секогаш сакаме да ги израдуваме со нешто што навистина им е потребно, па можеме да си дозволиме да ги прашаме што е тоа. Но, поголем дел од нив, нема да знаат што да ви одговорат и нема воопшто да ви помогнат при изборот, оставајќи ве со неограничено поле за вашата имагинација.

Што да подарите: зависно од возраста и полот, можете да го поврзете подарокот со хобито на личноста. Часови за јога, уметност, јавање коњи, карти за концерт и слични активности кои може да ги понуди местото во кое живеете.

Подарок за нов/а дечко/девојка

Навистина е непријатно чувството кога ќе влезете во врска токму пред ваков период или случување каде треба да подарите нешто, а не сте доволно блиски за да знаете што, или за да претерате со изборот.

Што да подарите:  секако, секогаш можете да играте на карта – универзалност (парфеми, сет за нега на тело со новогодишна тема, чанта, ранец, електронски помагала итн.

Овој период исто така е одличен и за новогодишни џемпери, капче, шалче, кебенце со празнични мотиви и убаво спакувано – никогаш нема да погрешите со ваков подарок.

Подарок за саканиот/а

Веќе подолго време сте заедно со партнерот и чувствувате како да сте си ги подариле сите можни работи, па веќе немате идеи. Тогаш е време за нешто поразлично и пооригинално, што можеби никогаш не би го очекувал.

Што да подарите: направете нешто сами и послужете се со сите Pinterest идеи за „направи сам“ проекти за него/неа. Понекогаш и не мора да биде нешто големо и скапо, доволно е да подарите нешто симболично направено со љубов (колачи, оригинален фото албум со откачени фотки од вашата врска, џемпер што ќе го сплетете со помош на вашата баба итн).

М. М. | Црнобело