Вчера се нервирав за боја за нокти, денес мислам како да си го спасам животот

Вчера се нервирав дека гелот за нокти не ми е во вистинската нијанса,

Дека ми го купиле последното бројче од фустанот што ми се допаѓа,

Дека партнерот наместо 10, ми купил 1 роза,

Дека струкот не ми е тенок како на моделите,

Дека другарката ми задоцнила 15 минути на закажаната средба,

Дека на работа колешката ме погледнала накриво,

Дека јадам многу чоколадо и ќе се здебелам,

Дека немам чевли во бојата во која ми е новата чанта...

Банално, банално, банално.

Просто човек да се засрами што сè може да му создаде бес , револт, тага и разочараност.

И не сум само јас, секој еден се нервира за работи за кои ИМА решение. Се нервираме дека немаме партнер, имаме многу работни обврски, имаме регистрација на автомобилот пред нас, немаме покачување на плата, имаме непријатели, немаме доволно патувања и што уште не.

СТОП! Имаш добро здравје и тоа е доволно. Дури и тие мали здравствени проблеми што ги имаш и за нив постои решение.

Но, што кога нема лек и никој ништо не ти ветува за сигурно?

Тогаш сфаќаш колку многу си имал претходно, но не си ценел. Си имал совршено здравје и си требал да му благодариш на Бог за тоа секој ден.

Да, тоа е доволно и сега само небото е граница. Штом го имаш тоа сето друго е променливо, решливо, привремено, банално и невредно за нервоза.

Диши со полни гради, биди среќен човек.

Заборави на ситните нервози. Не си го труј мозокот.

И запомни дека многу луѓе сè би дале за да се на твое место.

Ако си совршено здрав, само од тебе зависи дали ќе си дадеш шанса да бидеш совршено среќен.

©CRNOBELO.com Забрането преземање и копирање. Крадењето на авторски текстови е казниво со закон.

Автор: С. С. | Црнобело