Зошто Фејсбукот ни е преплавен со објави од непознати луѓе на страните на славните?

Детали

среда, 24 август 2022

Дали денес на Фејсбук ви се појавуваат објави од непознати луѓе споделени на страници на познати личности, компании и слично?

Денес, 24-ти август, Фејсбук корисниците од целиот свет пријавуваат сличен проблем.

На илјадници Фејсбук корисници, наместо објави од нивните Фејсбук пријатели и групите и страниците што ги следат, им се појавуваат објави од луѓе кои не ги ни знаат.

Овие објави се споделени на страници со многу следбеници, вклучувајќи и страници на кои не може да објавува никој освен администраторите.

Според веб-сајтот Downdetector, проблемот започнал околу 8 часот наутро.

Неколку светски медиуми пренесуваат дека се огласил портпарол на компанијата:

„Свесни сме дека некои луѓе имаат проблем со Фејсбук. Работиме да го решиме проблемот што е можно побрзо и се извинуваме за непријатностите“.

Некои корисници истакнуваат дека кај Инстаграм, другата социјална мрежа на Meta, нема проблеми, што значи проблемот е локализиран само на Фејсбук.

Не е познато што го предизвикува проблемот, но некои сметаат дека не се исклучува можноста да станува збор и за некакво хакирање.

Спирова С. | Црнобело