Пензионирана медицинска сестра дипломирала на 84 години – 7 децении откако се запишала на факултет

Детали

среда, 01 јуни 2022

Бети Сандисон (84) се запишала на факултет пред 67 години, но престанала со студиите за да се посвети на мајчинството и кариерата како медицинска сестра. Но откако се пензионирала, решила конечно да дипломира и годинава ја постигнала својата цел.

84-годишната Бети Сандисон од САД е доказ дека никогаш не е доцна да се посветите на вашите цели и да ги остварите. Бети е доказ и дека никогаш не е доцна за учење.

Пред 67 години, Бети се запишала на Универзитетот во Минесота, со тоа станувајќи првата личност од нејзиното семејство која се запишала на факултет.

По една година, таа добила лиценца за медицинска сестра, но решила да го продолжи образованието на универзитетот за да добие и диплома.

Кога го запознала сопругот, ѝ требале уште 25 кредити за да добие диплома, но наместо да дипломира, решила да се фокусира на кариерата како медицинска сестра.

Покрај тоа, Бети и сопругот добиле две деца, па нејзиниот приоритет било мајчинството.

До 2013 година Бети работела како медицинска сестра, а сите овие години одвреме-навреме помислувала на дипломата која ѝ била на дофат. Неколку години откако се пензионирала, Бети донела одлука конечно да дипломира.

„Излегов на ручек со пријатели и зборувавме за нашите желби и работите што сакавме да ги направиме. Им реков дека отсекогаш сакав да го завршам факултетот. Ми требаа уште околу 25 кредити за да дипломирам“, вели Бети за локален медиум.

Разговорот со пријателите ја мотивирал, па речиси веднаш потоа, во 2018 година, Бети се вратила на факултет.

Сепак, Бети признава дека ѝ било тешко да се навикне – покрај промените во изгледот на факултетот, не можела веднаш да се снајде со технологијата.

„Поради компјутерите речиси ќе се откажев“, вели таа.

Поради пандемијата, предавањата на факултетот почнале да се одржуваат онлајн, а на Бети ѝ било проблематично да го следи овој нов тип на настава. Поради тоа, решила да направи пауза.

Штом на факултет почнале предавања со физичко присуство, Бети повторно продолжила да ги следи и конечно дипломирала во мај годинава.

За мигот кога ја добила дипломата, Бети вели:

„Чувствував чиста радост. Чисто задоволство што ја постигнав мојата цел“.

Бети има и одличен совет за сите кои се двоумат за своите лични цели:

„Мора да го правите она што сакате. Не дозволувајте никој да ве сопре“.

Спирова С. | Црнобело