Девојче (14) со церебрална парализа руши стереотипи: Нејзината стенд-ап точка го стопи „суровиот“ Сајмон Кауел (видео)

Детали

четврток, 19 мај 2022

Полна со харизма 14-годишната Ева Адли од Англија храбро застана на сцената и се обиде да ги сруши сите стереотипи за луѓето со попреченост. Со доза на сарказам таа успеа да ја покаже „смешната“ страна на сопствената здравствена состојба, но истовремено да ја поткрене свеста за тоа како изгледа животот на лицата со попреченост во општеството.

Со солзи во очите родителите, судиите и публиката се смееја додека ја следеа стенд-ап точката на 14-годишната Ева Абли која боледува од Церебрална парализа, но тоа не ја спречи да настапи на популарното шоу Британија има талент (Britains Got Talent).

„Би сакала да се извинам ако не можете да разберете што ви зборувам, имам попреченост што се вика Церебрална парализа.

Па ако не можете да ме разберете, погледнете ја мојата точка од дома со превод.

Мојата целосна медицинска дијагноза е Спастична Атаксична Квадриплектична Парализа. Сериозно? Едвај успевам да ѝ поставам прашање на Алекса (гласовен асистент на мобилен телефон), а очекуваат да можам да го изговорам ова?“ – се пошегува таа.

Нејзината точка вклучуваше делови во кои го прокоментира и односот со соучениците, кои како што рече ѝ се смееле, заради што морала да започне да се образува од дома, а не им остана должна и на оние што се трудат да ја кренат свеста за лицата со попреченост така што тврдат дека овие лица можат да прават сѐ што ќе посакаат.

„Луѓето велат: ‘Можеш да направиш сѐ што ќе посакаш во животот, ништо не може да те сопре’...

Да. Тоа е точно, но до одреден степен. Мислам, дали би сакале некој како мене да ви извршува операција за да ви го спаси животот?“ – праша таа.

Нејзиниот настап беше поздравен со стоечки овации во публиката, а судиите во шоуто останаа воодушевени. Камерата постојано беше вперена во нејзиниот татко кој со солзи во очите го проследи целиот настап.

„Бестрашна си и луѓето ќе те сакаат“ – ѝ порача суровиот Сајмон Кауел, кој е дел од судиите во шоуто.

Ева заедно со мајка ѝ Кели гостуваше во британските телевизии каде откри дека заради болеста седум години била жртва на врсничко насилство во училиштето.

„Имаше тешки седум години, но успеа да се крене себеси и да исплива на врвот“ – рече мајка ѝ Кели.

Ева иако е многу млада, цврсто е решена да ја поткрене свеста за третманот што го добиваат учениците во училишната средина па рече:

„Се надевам дека никој нема да го помине во училиште тоа што јас го поминав.“

Погледнете ја во целост точката на Ева во продолжение:

https://www.youtube.com/watch?v=AR9oUgUdhSk

Б. С. Б. | Црнобело