Украинска кафетерија со мачки не затвора среде војна – се грижат за животните и за бегалците (фото)

Детали

петок, 04 март 2022

Сопственикот на кафетеријата вели дека не ни помислил да ги остави мачките сами и заедно со вработените продолжува да се грижи за нив и во воени услови, но и за бегалците на кои им треба топол оброк на патот кон Полска. Овие приказни за луѓе полни со хуманост ни го топлат срцето!

Таканаречените кафетерии за мачки се локали каде што можете да се напиете кафе и да јадете, но и да се дружите со мачките што живеат таму. 

Ваков локал има и во украинскиот гад Лавов – Cat Cafe Lviv – а сопствениците решиле да продолжат со работа и по нападите од Русија.

Во локалот кој работи веќе шест години живеат 20 мачки, а посветениот сопственик Серхи Олиник смета дека не треба да ги напушти. Тој има тим од неколку вработени кои продолжиле да работат и по нападите. 

„Нашите мачки живеат овде уште од кога имаа четири месеци. Тие ни се како семејство. Сфативме дека нема да ја напуштиме нашата земја и дека ова е единственото место каде што ја гледаме нашата иднина“, вели Серхи.

Сопственикот вели дека не ни помислил да ги остави мачките сами и заедно со вработените продолжува да се грижи за нив.

Локалот уште е во функција, а сопственикот вели дека со задоволство ги прима гостите и се надева дека неговите мачки барем малку ќе им го подобрат расположението во овие тешки денови.

Градот Лавов се наоѓа во близина на границата со Полска, па многу бегалци одат таму. Тие ја користат железничката за да ја напуштат земјата и да заминат во соседната држава. 

„Сега имаме многу помалку посетители, но има луѓе кои доаѓаат од други градови и на кои им требаат топол оброк и позитивни емоции“, вели Серхи.

Истовремено, Серхи открива дека локалот има две големи простории во подрумот кои можат да послужат како засолниште за гостите и мачките доколку добијат најава за напад.

Деновиве локалот стана хит благодарение на новинарка на CNN која живее во Украина. Како многу други, новинарката се упатила кон Лавов пред да ја напушти земјата и го посетила локалот.

Таа сподели видео на Твитер со опис:

„Овде е мрачен и тежок ден. Но, најдов нешто што не можеше да ми ја сопре насмевката. Единственото место за храна што беше отворено. Сопствениците прават храна со што имаат. Ми се насмевнаа и ми рекоа: ’Нашите мачки се храбри‘“.

It is a dark and heavy day here. But I found something that couldn’t stop a smile. The only food I saw open - Cat Cafe. The owners are making food with what they have - they smiled: “Our cats are brave”. pic.twitter.com/wAGEF9oPfW

— Erin Burnett (@ErinBurnett) February 25, 2022

Спирова С. | Црнобело