Не е само Меган Маркл: Кои се ѕвездите со чудни предбрачни договори?

Детали

сабота, 03 ноември 2018

Омилената трудница не е единствената славна личност што имала посебни барања од сопругот. На списокот ѝ се придружуваат повеќе добро познати фаци од светот на шоу бизнисот.

Меган Маркл во последно време ужива во наклонетоста на светската јавност. Новата членка на британската монархија привлекува внимание каде и да се појави. Од друга страна, медиумите неуморно копаат во минатото на војвотката од Сасекс.

Деновиве ги откривме деталите од нејзиниот предбрачен договор со првиот сопруг, кои дефинитивно фрлаат ново светло врз избраничката на принцот Хари. Пред склопувањето на бракот во 2011 година, Меган Маркл побарала од Тревор Енгелсон да потпише т.н. „договор за бременост“.

На овој начин, тогашната актерка сакала да го осигура детето и се обезбеди со сите потребни луксузи како мајка. Ја разоткри близок пријател, кој тврди дека побарала личен тренер и нутриционист, како и задолжителна дадилка од сопругот, за да таа може што поскоро да се врати на работа.

Колку и да звучи необично поставувањето вакви услови на партнерот со кого сте во љубов, ова не е реткост во светот на богатите и славните. Напротив. Немала само модерната „принцеза“ специфични барања. Тие се стандардна пракса.

Ви издвојуваме дел од ѕвездите со чудни предбрачни договори:

Том Круз и Кејти Холмс

Многумина се сомневаа во бракот на славната двојка од самиот почеток. Том Круз и Кејти Холмс се венчаа во 2006 година, а паралелно со останатите проблеми, сaентолошката вера на глумецот им ја докрајчи љубовта. Се разведоа во 2012 година.

Што се однесува до предбрачниот договор, во него наводно пишувало дека на сопругата ѝ следува надомест од три милиони долари годишно, сѐ  додека таа цифра не достигне 33 милиони.

Значи, по единаесеттата година од бракот, таа ќе беше сопственичка на половина од богатството на партнерот.

Сепак – во реалноста не испадна така. После пет години и половина заедно, Кејти одвај се извлече од бракот со Том. А, годишно добива 400 илјади долари за потребите на ќерката Сури.

Клое Кардашијан и Ламар Одом

Старлетата и кошаркарот застанаа пред олтар по само месец дена во врска. Но, дури и тоа кратко време им било доволно да состават прилично бизарен договор. И по сѐ изгледа фатален за пропаднатиот спортист, ако навистина се исполнува(л).

Прво, во него пишува дека сопругата ќе добива половина милион долари по година, па за четирите години поминати во брак, Клое Кардашијан „заработила“ 2 милиони долари. Освен споменатиот износ, предвидено е доживотно да ужива во ВИП-седиштата на натпреварите на Los Angeles Lakers.

Ѝ следуваат пет илјади долари за шопинг, 25 илјади долари месечна финансиска поддршка и илјада долари за инвенстирање во сопствениот изглед. И да – плус си ќари куќа.

Меѓутоа, имајќи предвид дека од тогаш до денес богатството на Кардашијанови повеќекратно се зголеми, а Ламар Одом се најде во пеколот на дрогата и алкохолот, се соменаваме дека поранешниот сопруг целосно се придржувал до условите.

Марк Закерберг и Присила Чен

Од поодамна се знае дека основачот на Фејсбук не е класичен славен фраер. Напротив – се чини како ѕвездениот статус воопшто да не го интересира. Во прилог на ваквата теза е и предбрачниот договор што го потпишал со сопругата Присила Чен.

Иако Марк Закерберг важи за еден од најбогатите луѓе на светот, содржината на договорот не се темели на пари. Во него пишува дека брачната двојка ќе мора неделно да помине барем 100 минути заедно, како и да имаат макар една љубовна средба.

А, во текот на неа, се разбира, не смее да ја користат социјалната мрежа.

Колку и да ни се слатки како пар, мора да признаете дека е малце чудно што распределбата на заедничкото време им е пропишано со договор.

Ким Кардашијан и Канје Вест

Ниедна бизарна листа не би била комплетна без нивните имиња. Предбрачниот договор на старлетата и раперот содржи една прилично луда клаузула.

Ким Кардашијан и Канје Вест потпишале дека Крис Џенер, познатата мама и менаџерка, не смее да им се меша во одлуките поврзани со кариерата. Остатокот е прилично незанимлив.

Ако се разведат, ѕвездата на реалното шоу ќе ги задржи сите можни подароци кои некогаш ги добила, а ѝ следува и милион долари за секоја година помината во бракот. Сопругот, нормално, нема да поседува права на нејзините лични приходи.

Иако приказната околу парите е класична, дали сте слушнале пар со предбрачен договор да ѝ стави „вето“ на свекрвата или мајката на жената? Нешто ни вели дека дел од читател(к)ите ќе подразмислат за ваквата опција во иднина.

Бред Пит и Анџелина Џоли

Двајцата од старт на врската беа мошне контроверзен пар. Од изневерувањето на Џенифер Анистон, па до актуелниот фатален развод преполн со скандали, Бред Пит и Анџелина Џоли непрестаjно ја интригираа јавноста.

Верувале или не, нивниот предбрачен договор се темелел на – верноста. Постои клаузула според која во случај на прељуба од страна на сопругот, старателството над децата го добива глумицата.

Парични износи не се споменати, ама очигледно е дека убавата Енџи највеќе се плашела од кармата.

Постапката за раскинување на бракот е уште во процес, а таа го обвини поранешниот партнер дека не плаќа алиментација. Од друга страна, актерот тврди дека нејзината единствена желба е да манипулира со медиумите. Штета, зар не?

М. А. | Црнобело