Фотошоп гафови на ѕвездите кои ја обележаа 2017 година

Детали

сабота, 23 декември 2017

Иако зад себе имаат цел тим од професионалци што се грижи за нивниот имиџ и објавите на социјалните мрежи, ним сепак им се поткраднаа катастрофални грешки. И, сите ги забележаа.

Ситните корекции на фотографиите не се воопшто страшни, а речиси и да не постои човек кој одолеал на искушението да ја „дотера“ својата слика со дополнителни ефекти.

Меѓутоа, кога нам омилените ликови од шоу бизнисот, или, пак, модниот свет ќе се заиграат со Фотошоп, тие неретко немаат мера. Па, будните очи на јавноста веднаш ги воочуваат нивните претерувања.

Чии грешки не останаа незабележани изминатите месеци? За волја на вистината, дел од славните личности и не се самите виновни за нив. Но, сеедно ја понесоа одговорноста и се соочија со линчот од јавноста.

Претпоставувате ли кои доминираат на листата? Секако – тука се вечно актуелните Кардашијанки, па дури три од нив не се прославија со своите лажни фотки.

Фотошоп гафовите на ѕвездите кои ја обележаа 2017 година се следните:

Усните и градите на Емили Ратајковски

Во септември, сексапилната Емили се појави на насловната страница од француското списание „Madame Figaro“, но и самата забележа дека нејзините усни и гради се фотошопирани. На својот профил на Инстаграм, таа ги сподели фотографиите пред и после средувањето, јавно критикувајќи ги челниците на магазинот за таквиот гест. „Се надевам дека модната индустрија конечно ќе престане со обидите да ги поправа нештата кои нѐ прават единствени, а ќе почне да ја слави индивидуалноста.“, напиша манекенката.

Ноктите на Ријана

Мегапопуларната Рири од Барбадос беше обвинета за фотошопирање на оваа егзотична карневалска фотка, затоа што на сликата јасно се гледаат два сини нокта на палецот од десната рака. Упс!

Задникот на Кајли Миног

Со фотографијата на која е во топ форма, атрактивната пејачка го најави својот календар за 2018 година. Меѓутоа, наместо задникот, детаљот кој им привлече најмногу внимание на фановите, ама и хејтерите, всушност е нерамнината на ѕидот во позадина. На разочарување на многумина, облините на Кајли се сепак дигитално уредени.

Десната рака на Крис Џенер

Мама Крис, позната и како мозокот во кланот Кардашијан-Џенер, често рекламира разноразни производи на Инстаграм. Впрочем, како и сите останати членови на семејството. Но, фотката со која во месец јуни промовираше чај за слабеење, очигледно беше фотошопирана. На прв поглед, повеќето следбеници ѝ завидуваа на нејзините цврсти и убаво обликувани бицепси. Сепак, измамата набрзо ја воочи целата јавност. Ја издаде десната рака. Поточно, дрвената греда зад неа, која изгледа невообичаено искривена.

Тенот на Ким Кардашијан

Обидот на Ким Кардашијан да се прикаже себеси со лажен „црн“ тен, пак, наиде на бурни реакции во јуни, кога старлетата ги објави промотивните фотографии за кампањата на козметичката линија KKW Beauty. Првин, ѕвездата на реалното шоу се правдаше дека претходно била на сончање, па затоа нејзината кожа е толку темна, како и дека никој од тимот не мислел дека тоа ќе претставува проблем. Меѓутоа, таа подоцна сепак ја призна грешката и ја поправи.

Стомакот на Клое Кардашијан

Последната членка на семејството Кардашијан што се најде на листата е Клое, која од ноември (не)вешто ја крие од јавноста секоја информација за наводната бременост. Притоа, мислиме и на оваа аматерски обработена фотка, која уште толку ги засили гласините дека таа е трудна. Направени се корекции во пределот на стомакот, а ја разоткри замаглената дланка на нејзиното момче Тристан Томпсон.

Левата рака на Џиџи Хадид

Дури и на најдобрите им се случуваат грешки, зар не? Во спротивно, како би ја објасниле насловната страница на престижниот моден магазин „Vogue“, каде манекенката Џиџи Хадид има невозможно долга рака?! Повеќето луѓе заклучија дека промената е направена за што помалку да се гледа плус-сајз моделот Ешли Греам на фотографијата, иако таа самата ги демантираше таквите тврдења.

Фризурата на Соланж Ноулс

Сестрата на славната Бијонсе беше исто така жртва на Фотошоп. Таа ја красеше насловната страница на списанието „London Evening Standard“, од каде ѝ ја изменија косата, бришејќи ѝ го комплетно најинтересниот дел од фризурата. Пејачката веднаш јавно реагираше, споделувајќи ја оригиналната фотографија, пропратена со стиховите од нејзината песна „Don't touch my hair“ („Не ми ја пипкај косата“).

Фигурата на Мараја Кери

Насловната страница на магазинот „PAPER“ со Мараја Кери, предизвика лавина од негативни реакции, дури и помеѓу најголемите обожаватели на пејачката.  Сите се сложни околу фактот дека нејзината фигура е фотошопирана до непрепознатливост, односно поп дивата воопшто не изгледа вака во реалноста.

Косата на Селена Гомез

Да, дури и на прекрасната Селена ѝ се потребни трикови за разубавување на фотките, но со малку поинаква цел. Додека мнозинството познати дами ги стеснуваат нозете и струкот, ги пеглаат брчките, или, пак, го зголемуваат задникот, младата пејачка посака да ѝ се додаде уште повеќе волумен на косата. Но, и неа ја издаде нерамниот ѕид во позадина. Сепак, можеби не е самата таа виновна, бидејќи фотографијата на Инстаграм ја објави нејзиниот фризер.

М. А. | Црнобело