„Гатанки за сè и сешто и за уште нешто” од Магде Ангова - нова книга која е совршен подарок за најмалите

Детали

вторник, 19 април 2022

Тој ги раскажува приказните на необичен наичин, знае да си игра со зборови, им додава некој магичен зачин. 

Точките, запирките и другите интерпукциски знаци, вешто ги протнува низ текстот, ко сонцето своите зраци.

Доколку е навистина талентиран, ќе ти направи кино в глава, неговите дела може да му донесат светска слава.

Ќе се сетите ли на одговорот на оваа гатанка?

Гатанката која го има одговорот – писател е една од стотината гатанки објавени во книгата „Гатанки за сè и сешто и за уште нешто” од Магде Ангова.

Промоцијата на првата книга за деца од младата авторка се случи на 08.04.2022 година во просториите на кафе книжарницата на Литература во City Mall.

Имајќи предвид дека литературата за деца спаѓа во една исклучително дефицитарна област, книгата претставува игрива збирка која ги оживува и осовременува гатанките како специфичен жанр, омилен и популарен за децата.

„Не постои апликација или онлајн игра која подобро ќе ги анимира и забавува децата од квалитетно време поминато со вас – родителите. Книга, секако, секогаш е одличен избор за забава, дружење и поврзување помеѓу родителот и детето, уште подобро доколку истата е интерактивна”, вели Магде Ангова.

„Книгата ‘Сто сонца’ од Видое Подгорец беше мојата првична инспирација за пишување на гатанките. Обожувам да римувам, да стихувам, да наоѓам необични, подзаборавени зборови од македонскиот јазик и истите да ги вметнам во современ контекст. Уживам кога пишувам за деца, особено затоа што тоа ја радува и ја инспирира и мојата шест годишна ќерка.

Пишувањето го разубавува и му дава живост на мојот свет, а уште поголема радост е што креативното творење го оформува и светот на Илина. Таа впрочем беше и мојот прв критичар, филтер за напишаните гатанки.

Да се пишува за деца не е едноставно, затоа што најмалите, всушност се и најголеми книжевни критичари и нивното внимание воопшто не е едноставно да се задржи. Квалитетот на напишаното кај децата се мери со времето, посветеноста и заинтересираноста за она кое им го нудите/читате.

Се радувам затоа што за кратко време книгата “Гатанки за сè и сешто и за уште нешто” котира високо на листата на читаност. Децата ја бараат, сакаат да ја читаат и да се забавуваат со гатанките.

Се разбира, ова ми е дополнителен мотив за и понатаму да творам жанровски за деца. Се пронајдов во пишувањето, се разбира дека истото го правам од поодамна, но сега откако е објавена мојата прва книга за деца, немам намера да запрам овде. Ќе пишувам и ќе создавам за децата затоа што тие се најискрената и најтопла читателска публика.”

Инаку, авторката живее во Гевгелија, а работи во Општина Дојран како личност за односи со јавноста. Таа е магистер по медиуми и комуникации, а во моментов ја завршува и магистратурата по психологија.