„Пеперутка“ на Сашо Димоски премиерно во радиоетерот

Детали

петок, 02 ноември 2012

Радиодрамата „Пеперутка“, авторски текст на Сашо Димоски, премиерно ќе биде изведена во недела (4.11.2012) на www.radiomof.mk во 22 часот.

Оваа приказна за љубовта и вербата во неа ќе ја интерпретираат Васил Зафирчев и Марија Зафирова, додека режисер на звучната слика е Тања Рибарска, која е и автор на музичката предлошка за радиодрамата.

„Пеперутката од една затворена чаура се претвора во едно прекрасно чудо на природата, а сепак живее само еден ден. За да се роди една љубов, потребен е миг, еден таков миг во кој живее и пеперутката“ - вели авторот Димоски.

„Пеперутка“ е прва од циклусот радиодрами со кои независниот театар „Театра“ ќе ја започне својата нова сезона и ќе го промовира проектот „Секаде театар!“. Идејата на самиот проект е преку текстови на млади и нови автори да се реафирмира радиодрамата како жанр, а воедно и да се излезе од конвенционалните рамки на театарот и да се влезе во домовите на неговите љубители.