Славчо Попоски, метеоролог: „Нè очекуваат поларни утра – температурите може да се спуштат до -15 степени“

Детали

вторник, 09 јануари 2024

Метеорологот Славчо Попоски најавува значително намалување на температурите, како и врнежи од снег. За време на викендот, пак, утринските температури можат да се спуштат и до -15 степени Целзиусови.

Утрово нè дочекаа мошне ниски температури, како и слаби врнежи од снег на повеќе места низ Македонија, а според метеорологот Славчо Попоски, можеме да очекуваме уште постудени денови.

Неговата прогноза во продоложение:

Во текот на минатата вечер, врнежи од снег со слаб до умерен интензитет имаше на повеќе места низ Македонија.

На планините и на скијачките центри очекуваме формирање на позначителна снежна покривка.

Од денес ни следува сув студ, а температурите наутро понекаде ќе се спуштат и до -10 степени. Преку ден останува многу студено со температури кои на повеќе места ќе се задржат околу или малку над нулата. Понекаде тие ќе останат и под нулата.

Во Скопје исто така очекуваме провејување на снег, особено во повисоките предели од котлината и на околните планини.

Сето ова ќе биде проследено и со северен ветер кој повремено ќе биде засилен на интензитет.

Во сабота и во недела очекуваме поларни утра и температурите на воздухот понекаде ќе се спуштат дури до околу -15 степени. Нови обилни врнежи од снег и нов циклон, барем според сегашните резултати на нумеричките модели, очекуваме веќе следната седмица.

Спирова С. | Црнобело

фото: Фејсбук; freepik.com