Потег за поздрав! Македонска фитнес инструкторка нуди бесплатни тренинзи за заболените од рак
- Детали
- среда, 30 август 2023
„До оваа идеја дојдов откако прочитав една статија поврзана со важноста на вежбањето за време на хемотерапија“ - открива за CRNOBELO.com, нашата фитнес инструкторка Александра Оровчанец која започна хумана акција за бесплатни тренинзи со цел да им помогне на лицата што во моментов ја водат најтешката битка за животот и се обидуваат да го победат ракот.
Македонската фитнес инструкторка Александра Оровчанец и сопственичка на фитнес студиото Ana Fit на својот Инстаграм профил објави дека се вклучува во хумана акција со цел да им помогне на сите лица заболени од рак, кои со моментов се лекуваат со помош на хемотерапија.
„Поради многуте придобивки од вежбањето за време на хемотерапија, сите болни од рак (за време на лекувањето) сега ќе вежбаат бесплатно во Ana Fit“ – вели таа.
Во продолжение појаснува дека дел од придобивките од редовното вежбање кај пациентите заболени од рак се:
- Помало оштетување на срцето;
- Намалување на чувството на замор;
- Намалување на болката и гадењето, подобрување на менталното здравје, како и 100.000 други причини.
Инаку, Александра е дипломиран Професор по физичко и здравствено образование на Факултетот за физичка култура, спорт и здравје во Скопје.
Таа е и државна рекордерка на Македонија во атлетските дисциплини 3.000 метри стипл, штафета 400×300×200×100 метри и штафета 4×300метри. Поседува бројни сертификати од многу семинари одржани во Македонија, во Србија и во Словенија.
Во изјава за CRNOBELO.com, Александра ни откри дека до идејата за оваа хумана акција дошла откако прочитала една статија за тоа колкави се придобивките од вежбањето кај луѓето заболени од рак.
„До оваа идеја дојдов откако прочитав една статија поврзана со важноста на вежбањето за време на хемотерапија и после оваа статија направив поголемо истражување и дојдов до заклучок дека на сите пациенти со хемотерапија мора да им се овозможи бесплатно вежбање.
Дополнително бидејќи сите тренинзи се со физичко присуство и онлајн истовремено, од сите градови ќе можат да се приклучуваат и да вежбаат“ - вели таа.
Нејзината акција е поздравена од нејзините следбеници и доби голем број лајкови и позитивни коментари.
Б. С. Б. | Црнобело / фото: depositphotos.com
Би можело да ве интересира:
Препорачуваме
Најчитани неделава
