Ја нарекуваа Вештерката од Банат, повеќе од 50 години труела луѓе: Која е баба Анујка, првиот сериски убиец во Србија?

Според пишувањата, ако некој од областа сакал да се ослободи од некој свој непријател, одел кај баба Анујка, а таа им давала од својата „лековита водичка“ во која имала отров.

Бидејќи станала експерт за отровни супстанции, можела точно да предвиди и кога ќе почине тој што го труела.

Многу наивни селани оделе кај неа да им помогне да си ги решат здравствените проблеми, а подоцна умирале во најголема агонија. Нејзините жртви претежно биле млади и здрави мажи.

Таа ги поткупувала и локалните полицајци, па никој не ја допирал. Повеќе од 50 години жителите на Владимировац стравувале поради неа.

Многумина покажувале голема почит кон неа и ѝ се тргале од патот само за да не им наштети.

Некои тврделе дека е вештерка со натприродни моќи, но таа само знаела како да ги залаже и отруе луѓето.

„Ѓаволската водичка“ ја наплаќала скапо, околу 3.000 до 5.000 динари, во време кога весниците се продавале за само 1 динар.

Но, во декември 1927 година од отровниот напиток на баба Анујка починал извесен Гаја Прокин, моќен човек од Банат.

Обдукцијата покажала дека во неговото тело има голема количина арсен, што предизвикало сомнеж кај властите.

Во Србија е направена ексхумација на многу тела и во дел од нив е пронајден арсен.

Анујка била уапсена и обвинета за смрт на 3 луѓе, па ја осудиле на 15 години затвор. Против неа сведочела една од нејзините следбенички, која, наводно, не добила пари за својата работа.

Во тоа време старицата веќе имала 90 години. Отслужила дел од казната и била ослободена во 1936 година, кога веќе имала 98 години. Починала 2 години подоцна, кога имала 100.

Нејзините следбенички, пак, биле стрелани во 1945 година.

А. Ј. | Црнобело