Србинката Горана љубовта ја донесе во Македонија: „Веќе 13 години Скопје ми е дом, тука ми се родија синовите“

Што те нервира најмногу тука?

Викендите во Скопје за семејство може да бидат убави и помирни за разлика од Белград, кој е поголем и постресен како град за секојдневно функционирање.

Нервоза во Скопје ми прави негрижата на луѓето за чистотата на улиците и изгледот на градот, кој во последно време е запоставен.

Скопје некогаш беше омилен град за излегување и забава кај Србите.

Кое ти е омилено македонско јадење?

Омилено македонско јадење ми е домашниот ајвар, потоа полнетите пиперки, но и сите јадења направени во македонски глинен сад.

Кои ти се омилени места во Македонија?

Во Македонија има многу убави места, но за мене секогаш Охрид ќе остане најубав и му се радувам на секое одење таму.

Исто така, го обожавам и кањонот Матка кој има нешто магично во себе, кое со зборови не може да се опише.

Секогаш задолжително ги носам таму моите гости од Србија. Сакам да ја почувствуваат таа природа, а да ги посетат и убавите етно ресторани во околината на Скопје.

Какви се Македонците во браковите и љубовните врски, а какви Србите?

Македонците во брак се внимателни, се грижат за фамилијата, сакаат да им помагаат на жените, како и да готват, за разлика од Србите, кои повеќе се за седење по кафеана.

Во Македонија викендите се резервирани за фамилијата и ручек кај најблиските, се негува традицијата во весела и топла атмосфера.

Колку сме исти, односно различни, како менталитет?

Ние сме еден народ, долго време сме биле и една држава, Југославија - со исти вредности, со сличен менталитет, со почитување и љубов едни за други.

Ако споредувам, би кажала дека Србите се поотворени, поискрени како народ, за разлика од Македонците, кои се позатворени. Но, од друга страна Македонците се попозитивни и подобри домаќини.

Дел си од српскиот културно информативен центар СПОНА во Скопје... Колку Срби од Македонија членуваат, имате ли организирани дружби, хуманитарни акции, како функционирате?

Покрај часовите по пилатес, кои ги држам во студиото Кети ФИТ, две години сум дел од српскиот културно информативен центар СПОНА.

Преку СПОНА учествувам во разни хуманитарни акции и тоа чувство да помагам на другите прави да се чувствувам среќна и задоволна.

Културно информативниот центар СПОНА е здружение на Срби, но ги обединува и другите народни и етнички заедници.

Организираме книжевни вечери, работилници и уметнички изложби за сочувување на вистинските вредности, култура и традиција.

Во СПОНА покрај книгите на српски јазик, имаме и автори на македонски, како и разни странски автори.

Од овој месец почнуваме со нов проект „СПОНА ПОДКАСТ“ и јас тука ќе бидам модератор и водител на програмата, што за мене претставува нов предизвик и мотивација во мојот град Скопје.

©CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело